www.koczala.hiazintus.com 

Schlochau 6. November 1374

Wir bruder Wynrich von Knyprode homeister des ordins der brudere des spitals sendte Marien des dutzchen husis von Jerusalem, mit rate unsir metegebitere, vorlyen und gebin Jacob von Dachsdamerow und synes brudirs kindren, und iren allen rechten erben und nachkomelingen, XXVI huben zcu Zwyrsno mit dem see, der Zwyrsno heysit, gelegen bynnen den grenitzen, als sie in bewisit sint von unsren brudren, zcu Culmischem rechte frie erbelich und ewiclich zcu besitzen; doch also, das der vor-geschrebene Jacob und syne erben und nachkomelinge zcu-vor-us sullen haben zcwu huben in dem vor-benumeten gute. Ouch neme wir uns us unsir buten, dy wir itzunt haben in dem-selben gute; abir keyne nuwe buten sullen unsir butener vorbas me da nicht machen. Hirvon sullen sie uns thun ein platendinst zcu allen herferten, zcu lantweren, nuwe husir zcu buwen, alde zcu brechin adir zcu bessirn, wenne, wy dicke und wohin sie geheysen werden von uns adir von unsren brudren. Ouch sullen sie uns geben vor daz pfluckorn und von dem vorgenanten Zwyrsno dem see XXX scheffil habir, und zcu bekentnis der herschaft ein pfunt wachs und eynen Colnischen pfennig, adir vunff prusche pfenninge an des stat, alle iar off sendte Mertins tag des bischofis. Czu ewigem gedechtnis desir dinge habe wir unsir ingesigel an desin briff lazen hengen. Gegeben zcu Slochow am montage vor Martini in unsirs herren iaren M°CCC° in dem LXXIIII iare. Gezcuge sint unsre liben brudere, her Swedir von Pelland treseler, bruder Heynrich von Grobitz kompthur zcu Slochow, bruder Danyel von Menden kompthur zcur Swetze, her Nycolaus unsir capplan, Cune von Libensteyn unsir kumpan, und andir erbar lute.

Źródło: Paul Panske: Handfesten der Komturei Schlochau 1323-1466. Quellen und Darstellungen zur Geschichte Westpreussens. Danzig 1921

^do góry ^

Strona główna

Publikacje

Wybór tekstów

Stare fotografie

Najstarsze dokumenty

Linki

Kontakt

Reklama